Dúas pratas porriñesas no Campionato de España de ciclocross

Dúas medallas de prata para ciclistas porriñesas nunha xornada final con catro metais para a selección galega de ciclocros. Unha colleita que non foi a esperada, pero que resultou positiva no peche do Campionato de España de ciclocross que se celebrou na localidade vasca de Amurrio.

As boas novas tiveron acento feminino porque foron mulleres as que subiron ó podio. As porriñesas Laura Mira e Aroa Otero obtiveron a segunda posición, mentres que Lorena Patiño colgouse un ouro e Irene Trabazo, o bronce.

A proba júnior viviu un dobrete galego. O dúo formado por Patiño e Otero era o favorito para acadar os dous primeiros lugares, pero non resultaría sinxelo nun trazado difícil, con lameiro, propio do País Vasco. A isto engadíase unha importante competencia, pero Patiño, que milita no XSM marinense, rachou pronto a carreira e foi en solitario cara a vitoria (46:08). Por detrás, Aroa Otero tivo que facer a súa carreira ante a competencia de Ana López Burgos, de Aragón. Conservou certas forzas e na derradeira volta superou de xeito claro á súa opoñente para asinar a segunda praza e con ela asegurarse a prata. Cedeu 42 segundos.

A que non tivo o seu día foi a tamén porriñesa Marta Estévez, que en moitas das probas da tempada actual acompañou no podio ás medallistas de onte, pero rematou na sétima posición tras deixarse 6:46. Lonxe do seu rendemento habitual.

Tamén acadou unha segunda posición Laura Mira na categoría sub-23. Neste caso, en mulleres non se realizou división e competiron xunto coas elite nunha proba con dous metais para as galegas. A marinense Irene Trabazo obtivo o bronce tras deixarse 1:34 con Lucía González (53:26), mentres que na loita pola segunda categoría, a porriñesa competiu ben para acadar a prata. Asinou a catalana Marta Cano 56:19 e algo máis de dous minutos despois cruzou a liña de chegada a corredora louriñesa, con dez segundos de renda sobre o bronce.

Nesta proba tamén tivo un papel destacado a viguesa Carla Fernández, que competiu co seu maillot do Que Bici-Marcisport tras no entrar na selección galega. Asinou a quinta posición elite (6ª na xeral) a 4:34. Tras uns meses de dificultades, amosou que esa tempada recuperou un nivel alto.

A mala nova da xornada chegou na categoría sub-23 masculina, na que o ponteareán Miguel Rodríguez, que é o mellor español no ránking internacional, tivo un día negado no trazado vasco de Amurrio e estivo lonxe do seu nivel habitual para ser quinto. O corredor do Supermercados Froiz tivo unha caída para culminar un día que xa ía por un sendeiro negativo. A vitoria foi para Raúl Mira, de Valencia, con 52:34. Rodríguez deixouse 1:41 e o podio tamén quedou afastado, a máis de medio minuto. Deberá recuperarse no que queda de tempada porque ten por diante varias citas internacionais e, probablemente, o Mundial de Tabor, na República Checa. En todo caso, nos últimos anos, nos que entrou na idade sub-23, ten cruzado o Campionato de España.

Na mesma carreira, o vigués Anxo Carril rematou na novena praza (a 2:56). Nunha proba con diferenzas escasas, estivo un chanzo por debaixo do esperado pero salvou o top-10.

Entre os elites, revalidou o título de campión de España o levantino Felipe Orts (1h 04:00) nunha cita dura pola choiva caida ó longo da mañá e cun gran nivel porque soamente doce participantes lograron acabar a proba sen perder volta. Entre eles estivo o vigués Samuel González, que foi décimo tras ceder 8:42. É a mellor clasificación na traxectoria do olívico dentro da principal categoría.

A proba de Amurrio pechou a tempada para moitos ciclistas, pero un grupo importante ten unha nova cita o domingo na Copa do Mundo de Benidorm. A cita servirá para rematar de confeccionar a listaxe da selección española para o Mundial. Sumar puntos de categoría UCI é algo fundamental para cumprir os requisitos de selección que pide a Federación Española.