Loita moañesa polo ascenso e o título

A loita ten arrecendo de quedar en Moaña. Tirán Pereira, como gran favorita, e Samertolameu, como secundaria principal, son as traiñeiras que parecen chegar un paso por diante á tempada da Liga Galega de Traiñeiras, que comeza esta fin de semana en cunha dobre sesión de remo para a Liga Feminina e a primeira categoría masculina e cunha proba, o domingo, para a segunda de homes.

Precisamente, entre as mulleres, o cartel de candidato é absoluto para Cabo da Cruz. O barco de Boiro, que o ano pasado cedeu ante a unión de Mecos-Coruxo, parte, a priori, dous pasos por diante dos seus rivais que, precisamente, tamén deberían proceder dos clubs de Moaña nunha tempada histórica no remo da localidade porque, a pesar da pandemia da Covid, este sábado haberá por primeira vez na Liga Galega representación dobre no auga de Tirán e Samertolameu.

De regreso ós homes, Benji Vázquez, técnico do equipo do Con, recoñece que ten "máis potencia que a pasada tempada", na que a súa tripulación rematou na segunda posición en Galicia por detrás de Ares e na cuarta no 'play-off' de acceso á Liga ACT. Gañar o título e regresar á máxima categoría son as metas no horizonte do preparador. Cun repaso home a home da súa tripulación, amósase un notable potencial con máis dunha decena de remeiros con experiencia na categoría e, especialmente, a madurez de canteiráns de baixa idade pero chamados a aportar moitos watios. A todos eles engadiuse Cristofer González cedido por Kaiku, da máxima categoría, por cuestións laborais.

Un paso por detrás do seu veciño aparece Samertolameu con Dani Pérez Fandiño como técnico. O adestrador deu este ano un salto na renovación do equipo destinada a crear una base sólida para a vindeira década con deportistas xuvenís –podios en anos anteriores no Campionato de España– que afrontan o seu primeiro ano cunha importante responsabilidade. Perderon a regata no inicio de campaña ante Tirán, pero o barco pode ter melloría coas semanas porque debido ó coronavirus non tivo a rodaxe necesaria tras facer trocos. Ademais dos remeiros da casa, o preparador mantén a veteranos de nivel como Víctor Rodríguez, Macey ou José Boubeta e incorporou calidade coa chegada de José Parada 'Txiqui', Fran Abreu e Dani Folgada. De non poder estar ó nivel dos seus veciños, asegurar a segunda posición e, polo tanto, una praza na promoción de ascenso á ACT é a meta final.

Ante a fortaleza dos dous barcos de Moaña, aparece Vilaxoán como principal alternativa baixo a tutela de José Ángel Cambados 'Truco', exadestrador de Tirán Pereira na ACT e cunha notable experiencia na máxima categoría. O principal hándicap é que deberá xestionar unha tripulación nova e con moi poucos canteiráns, o que pode limitar o seu rendemento.

A partir de aí, ningunha outra tripulación parece poder aspirar ás prazas dianteiras, aínda que Mecos –moi renovada tras o terceiro posto de 2019- e Bueu, con remeiros de nivel pero moita xuventude, poderían loitar pola zona alta.

Completan a categoría o filial de Cabo da Cruz, Esteirana, Mera, Muros e Rianxo. En total, serán dez barcos na máxima categoría e seis na segunda, que estará composta por Castropol, Cesantes, Chapela, Perillo, Narón e Puebla. Un número reducido polas renuncias forzadas pola pandemia da Covid. A viguesa Coruxo foi a primeira en renunciar e despois seguíronlle A Cabana (homes e mulleres), Mugardos (homes e mulleres), Esteirana (mulleres), Náutico de Riveira (mulleres), Cedeira (homes) e Amegrove (homes).

O inicio da competición adiouse ata este fin de semana, medio mes máis tarde do inicialmente previsto. Días para avanzar no acople dos barcos nunha disciplina moi técnica.