Abanca multiplica por 2,1 o seu volume de negocio en 10 anos

Abanca celebrou onte na Coruña un evento corporativo para celebrar os seus primeiros dez anos de actividade e comezar a trazar a súa estratexia de cara ao futuro. O evento reuniu a máis de 6.000 persoas procedentes de distintos puntos de España, Portugal e outros nove países de Europa e América nos que a entidade financeira desenvolve a súa actividade.

A axenda do día, de marcado carácter festivo, incluíu as intervencións do presidente do banco, Juan Carlos Escotet Rodríguez, e do conselleiro delegado, Francisco Botas, quenes lembraron a positiva evolución do banco desde o seu lanzamento en xuño de 2014 e presentaron as grandes liñas da estratexia para os próximos exercicios.

“Dez anos despois, volvemos a este mesmo lugar, escenario da nosa primeira convención, como unha entidade plenamente asentada, competitiva, con personalidade diferenciada e recoñecida polo mercado”, destacou Juan Carlos Escotet Rodríguez.

“Somos unha organización que pensa no longo prazo: temos por diante un proxecto de crecemento para desenvolver o noso modelo como entidade financeira e seguir facendo historia”, sinalou Francisco Botas.

Como primeiro paso, a entidade implantou un novo modelo de goberno corporativo baseado na profesionalidade e as mellores prácticas das sociedades cotizadas. Esta decisión acompañouse da creación dunha nova cultura corporativa baseada na calidade, a confiabilidade, a responsabilidade e a innovación.

Nestes dez anos o banco veu crecendo cunha marcada vocación ibérica, ampliando os seus mercados e renovando e dixitalizando toda a entidade cunha inversión de máis de mil millóns de euros. A entidade multiplicou por 2,1 o seu volume de negocio, por 3,2 a súa marxe financeira e por 1,6 os seus gastos de explotación, cifras que tiveron reflexo na mellora da eficiencia.