Igualdade no campus

A presidenta da Deputación, a viguesa Carmela Silva, acompañada do alcalde Abel Caballero, e da deputada de Igualdade, Isaura Abelairas, fixo entrega dos primeiros premios “Sofía Novoa Ortiz” convocados pola institución provincial para galardoar a inclusión da perspectiva de xénero nos traballos de fin de grao e de máster e impulsar o estudo e a investigación en materia de igualdade. Neste contexto, Carmela Silva manifestou que “a igualdade repercute en beneficio do progreso e do benestar do conxunto da sociedade polo que é fundamental promover que dende o coñecemento, a investigación e a análise universitaria se incorporen os seus principios”.

Silva agradeceu a elevada participación nos Premios Sofía Novoa Ortiz, “cun total de 22 traballos presentados, once para cada unha das dúas categorías: fin de grao e máster” e aproveitou a ocasión para recordar os principais fitos da vida de Sofía Novoa Ortiz e o que supuxo esta muller pioneira para o acceso ó sistema universitario das mulleres, “chegando ata dirixir un centro con capacidade para albergar ata 71 mulleres para que puidesen estudar e converterse en mulleres vangardistas, profesionais e independentes”.

Na modalidade de traballo de fin de grao, outorgáronse dous premios de 1.000 euros aos traballos de Laura Serén García (Pontevedra) e Cristina Gandón Villar (Cangas), “A asemblea como recurso educativo para fomentar a igualdade entre os sexos na educación primaria” e “El lenguaje icónico en los libros de texto desde una perspectiva de género y su evolución desde EGB hasta Primaria” ademais dun accésit de 600 euros para “Impacto psicosocial en la mujer mastectomizada: rol de enfermaría”, de Carla Novo (de Vigo).

Pola outra banda, os traballos de Lucía Pereyra (Pontevedra) e Isabela Andrés (Ourense), isto é, “Evolución da linguaxe non sexista e papel da muller en dous libros de texto de historia (1989 e 2015)” e “There are no ugly women, only lazy ones”, levaron os dous premios de 1.000 euros na modalidade de traballo fin de máster e, xunto a eles, o accésit de 600 euros foi a “Igualdad de género: un análisis longitudinal de las imágenes en los libros de enseñanza secundaria obligatoria y el bachillerato unificado”, de Andrea Álvarez (Vigo).

Unha muller pioneira e esquecida pola historia

n n n A entrega dos Premios Sofía Novoa Ortiz serviu tamén para renderlle unha homenaxe a esta muller pioneira pero esquecida pola historia e cuxa memoria comezou a ser recuperada recentemente grazas aos estudos elaborados por Carmen Losada –quen tamén interveu na entrega de premios- Leticia Sánchez, Ricardo Gurriarán, Elvira Melián… Nesta homenaxe recordouse o ingreso de Sofía Novoa Ortiz, aos 17 anos, na “Residencia de Señoritas” de Madrid, dependente dunha institución que se encargaba de fomentar a renovación pedagóxica e científica en España no primeiro terzo do século XX (a “Junta para Ampliación de Estudios e Investigaciones Científicas”), na que Novoa impulsou un ambicioso e pioneiro programa educativo a través do cal posibilitou o acceso á educación superior a moitas mulleres. Tamén se repasou o seu exilio en Estados Unidos dende que estalou a Guerra Civil ata o ano 1967, período no que tan so regresou a España en 1949 para defender a súa tese en Madrid.

Pola súa banda, Isaura Abelairas asegurou que todos os traballos foron premiados por unanimidade, con diferenzas mínimas de un ou dous puntos nas puntuacións.