Tres mulleres e un home lograron ser ‘Novos Talentos’

nnn Mohamed El Amine Asselman, coa obra ‘Ordersound’, Elena Matamoro Gómez de los Infantes, coa peza ‘La mirada que escucha’, Rosa Pardal Aragunde, coa fotografía ‘Habitación nºA’, e Alba Castillo Costa, coa escultura denominada ‘Maleza’ resultaron gañadores das catro bolsas do certame Novos Valores na súa edición de 2019, outorgados pola Deputación Provincial de Pontevedra.

O xurado considerou que as pezas presentadas, xunto coas propostas de proxectos a desenvolver, e a traxectoria das persoas gañadoras (estudantes, máster ou doutorandos na Facultade de Belas Artes de Pontevedra da Universidade de Vigo) merecían o recoñecemento de entre as 110 persoas aspirantes. Os galardonados recibirán 7.500 euros para continuar os seus estudos.

As pezas gañadoras xunto a outras 31 seleccionadas polo xurado conformarán a exposición Novos Valores 2019, que se mostrará no Sarmiento do Museo de Pontevedra do 8 de agosto e ata o 15 de setembro. Son sete pinturas, nome fotografías, tres debuxos, cinco esculturas, un vídeo, sete gravados, e tres creacións denominadas ‘varias’.

A obra de Mohamed El Amine Asselman, ‘Ordensound’, inclúse en “varias” por pretender unir a música e os mosaicos xeométricos por ter unha estrutura moi parecida. Busca unha linguaxe propia para traducir visualmente a música, presentándose cinco pezas enrolladas en bobinas de latón e expandidas no espazo.

‘La mirada que escucha’, de Elena Matamoro, é tamén unha creación relacionada coa música. Pretende representar a aleatoriedade da natureza en sons. Coa observación, rexistro e análise da forma en cada imaxe traduce á escritura musical en pentagramas, claves e notas.

‘Habitación nºA’ é a fotografía seleccionada polo xurado e realizada por Rosa Pardal Aragunde. Pertence a unha colección de fotografías nas que amosa unha visión persoal sobre a contorna rural e “na que se ve representada a autocreación dunha muller saída do seu cadro e cosendo a súa propia vestimenta, ao seu gusto e sen nada que agardar das opinións dos demais”.

Alba Castillo Costa presentou ‘Maleza’, unha escultura que mostra a paradoxa dun mundo real no que a natureza e o natural carecen de sentido e no que cada vez todo é máis artificial. “É por isto –di a autora- que a maleza, a espesura, o horror vacui de plantas, resalta en partes con material de ouro –por excelencia na ornamentación barroca- que nos fai fixar a mirada para atoparnos cuns ollos que nos observan. Maleza é o que nos invade, o que nos rodea e a través do que nos podemos agochar”.

O xurado estivo composto polo director do Museo de Pontevedra, José Manuel Rey García; a artista Itziar Ezquieta Llamas; a comisaria de arte, Mercedes Rozas Caeiro; a decana de Belas Artes, Silvia García González; a crítica e profesora da Facultade, Susana Cendán Caaveiro; o deputado da Deputación de Pontevedra Carlos López Font; o secretario da Deputación de Pontevedra, Carlos Cuadrado Romay; e o director do Museo de Arte Contemporánea, Miguel Fernández-Cid Enríquez.n