Xosé Lois Ripalda asina o libro vigués adicado á Raíña Letizia

O escritor afincado en Vigo, Xosé Lois Ripalda (Erbedeiro, 1940) adica o seu último libro á Raíña Letizia: “Quero reivindicar a súa persoa, facerlle unha homenaxe porque a súa é unha travesía polo deserto; involúcrase no pobo e preocúpase pola xente, considero que ten unha proverbial intelixencia e ten en consideración a literatura infantil”. A publicación “O día máis feliz dunha raíña” inclúe a carta de agradecemento do anterior xefe da Secretaría da Raíña de Zarzuela, José Manuel Zulueta, datada o 30 de novembro de 2022. “Mandeille o borrador e agora enviarelle tamén o texto xa publicado”, indica o autor.

É un conto para lectores maiores de 7 anos, publicado por Ir Indo con ilustracións e texto de Ripalda, quen considera que a figura da raíña en xeral é un feito extraordinario. “Eu non son monárquico, son das persoas boas que fagan ben as cousas”. Declárase incondicional de María Antonieta e de Cleopatra, ambas por saber morrer. A primeira “non perdeu a dignidade e soportou o insulto dos franceses camiño á guillotina” e a segunda, “suicidouse para non ser levada a Roma como un trofeo”.

Así, fala do relato como una historia ficticia “que ben podía ser real”. Preparan unha cerimonia en honor a súa maxestade, pero desaparece a coroa. Todo o mundo a busca, agás a monarca que confía en que quen a colleu devólvaa a tempo. E así, a anduriña, para quen as súas crías ven merecían un niño real, entrega a prezada xoia.